أعلن الفنان القدير محمد صبحي، رأيه في تقديم عمل درامي يتناول قصة حياة الفنان أحمد زكي، قائلًا: إنه لا يرفض ولا يملك حق الرفض، وكان ضد الراحل عندما جسد شخصية عبد الحليم حافظ، في مسلسل، على الرغم من أنه كان عبقريًا في تجسيد شخصية السادات وجمال عبد الناصر.
وتابع خلال مداخلة هاتفية مع الإعلامي وائل الإبراشي ببرنامج “التاسعة”، على شاشة القناة الأولى المصرية: “قولت إني مش شايف مين يجسد شخصية الفنان أحمد زكي، وقولت اللي عاوز يجسد شخصية فنان يستنى بعد 50 سنة، عشان الجمهور لما يلاقي ممثل بيعمل الدور ده يبقى فاهم، لكن شوفت ممثل له طبيعة معينة وشكل معين وطريقة تمثيل معينة وشكل معين، ومينفعش نختار بالشكل بس”.
واستكمل “أتمنى محمد رمضان ميعملش ده ويفشل، وأتمنى صورة أحمد زكي متتهزش عند المشاهد، لأنه الجهمور شايله أعمال كبيرة جدا”.
ونوه بأن الفنان أحمد زكي، يتواجد في ذهن الجمهور بشكل خاص وبمشاهد معينة، لا تتوافر لدى محمد رمضان، متابعا: “هو إنسان معندهوش حاجة تانية غير الفن، أحمد زكي أتوفى وهو معندهوش فلوس، أحمد زكي مكانش بيشتغل عشان الفلوس، أحمد زكي بالعافية عنده عربية، لما يبقى في وجدان الناس محمد رمضان بيعمل نوعية من المسلسلات والأكشن والغنا، وراجل خلى الجمهور يشوف بيته والـ4 عربيات”.
واختتم بقوله: “المشاهد هيقول أحمد زكي مش كدا، وعشان كدا أُفضل، أن يظل أحمد زكي عند الجمهور بعظمته وجماله، وأحمد زكي مكانش في حياته حاجة تانية عشان نحولها لسيناريو، وحياته آكل شارب نايم، اتجوز وطلق كله، كان في الفن وما يقدمه أهم حاجة في مذكراته فنه، ولازم يكون في حرص شديد جدا”.
