سؤال لكل طالب مصري اللي انا منهم : انت عايز أية ؟؟؟
ياترا انت عارف انت عايز ايه !!! طب بلاش السؤال دا انت عايز الدوله تعملك اه ؟ ياتري انت عارف انت عايز الدوله تعملك ايه اصلا !!!
بص انا مش هقول غير ربنا يهدي كل طالب مش عاجبه العجب.
طبعا كل الناس عارفة اللي حصل السنة دي في امتحانات الثانوية العامة من غش و تسريب امتحانات و و ……..الخ وطبعا كل الطلاب وأولياء الأمور فضلوا يشتموا في الدولة ويدعوا علي الدولة والنظام وفي اللي يقول الغلط من الدولة واللي يقول الغلط من اللي بيغش واللي يقول الغلط من اللي بيسرب الامتحانات واللي شاف ان تسريب الامتحانات شئ صح واللي شاف ان تسريب الامتحانات شئ غلط …….. عموما انا مش هتكلم في الموضوع دا خالص لانه بالنسبة لي اتقفل ومبقاش في فايدة من الكلام فيه بس هتكلم عن الطلاب والشعب اللي مش عاجبه اي حاجة خالص ………. اللي فضل يقول التنسيق دا ظالم و يعني ايه واحد مستقبله يضيع علي ١٪ وان المصححين مش بيصححوا بضمير وان الفساد وانعدام الضمير بيضيع مستقبل شباب كتير وفضلوا يطالبوا بنظام القدرات والمساواة بالدول المتقدمة و كلام من ده كتير ….. وبعد كدة الوزارة تطلع قرار بتطبيق نظام القدرات…. لكن الغريب فعلا هي رد فعل المصريين.
بمعني ان اي حد هيقرأ الكلام دا هيقول ان المصريين زمانهم دلوقتي فرحانين جدا جدا جدا ….. لكن كالعادة المصري دايما بيخالف كل التوقعات و كان رد فعله هو …….. انه يفضّل يشتم في الحكومة بردوا.
طب ليه بيشتم في الحكومة مادامت عملتله اللي هو عايزه !!!!! الطلاب قالوا ان نظام القدرات دا كوسة و مش هينجح فيه غير اللي معاه فلوس طب هو نظام القدرات ماكنش كدا قبل ماتطالبوا بيه ؟ طب بلاش السؤال دا انت ازاي بتقول ان النظام دا كوسة قبل ما تجربه اصلا؟ طب بلاش دا كمان تعالو نفكر بصوت عالي مع بعض و نسأل نفسنا اي نظام أحسن التنسيق ولا القدرات؟ ونعمل مقارنة بينهم من حيث السلبيات و الإيجابيات نبدأ بنظام التنسيق ……
الصراحة انا مش شايفة له اي ايجابيات ولكن السلبيات كتييييييير جدا أولهم لما واحد مايدخلش الكلية اللي هو عايزها و نفسه فيها وماينفعش في غيرها علي 1% او اي فرق قليل جدا وترسي في الاخر علي كلية مش طايقها و يشتغل شغلانه مش عايزها و طبيعي هيكون فاشل فيها …… ده كله لو اعتبرنا ان ورقته اتصححت بضمير و اخد الدرجة اللي يستاهلها …….. إنما اتفرج بقا علي اللي بيكون دافع فلوس يامه علي دروس و مشاوير ومستشفيات بسبب الضغط النفسي وفي الاخر يجيب درجة مش درجته علشان مصحح معندوش ضمير كسل يكمل قراءة الإجابة او كسل يشغل عقلة ويفكر لو كانت الإجابة اللي في الورقة صحيحة ولا لا ……. وحاجات تانية كتير بتحصل في السنة دي
نمسك بقى نظام القدرات و انا هنا هبدأ فيه بالسلبيات واللي هي حاجة واحدة بس وهي الكوسة اللي برضوا بفعل المصريين مش الحكومة ومع ذلك هنعتبرها عيب في النظام لان بردوا من الظلم ان بعض الطلاب يعدوا من الامتحان بالساهل بسبب مركز والدهم او والدتهم …… بس تعالوا نفكر كدا … مش احساسكوا بالظلم هيكون اقل في نظام القدرات ودا بسبب ان سلبيات نظام التنسيق كانت بتمنعك أساسا من دخول الكلية اللي انت حاببها وكانت بتقضي علي مستقبلك ولكن نظام القدرات السلبية اللي فيه مامنعتكش من دخول الكلية اللي انت عايزها هي كل اللي عملته انها سهلتها علي غيرك و طبعا برضوا بالسلبية دي مفيش حد فاشل قوي هيعدي من الاختبار دا ( بمعني انت هتبقي حاسس انك اتساويت بواحد بالمستوي المتوسط مش فاشل ) و اعتقد ان نظام القدرات ارحم بكتير من التنسيق من جهة السلبيات ……… تعالو بقا للإيجابيات اللي أولهم ان اخيراً كل واحد يقدر يدخل الكلية اللي بيفهم فيها ودا غير طبعا توفير فلوس الوالدين في الدروس و اكيد الضغط النفسي يعني كأن بالضبط هم وانزاح عن قلبك و لو جينا للمدارس فلأول مرة هيكون في طلاب الصف الثالث الثانوي في المدرسة لأنهم مش هيكونوا محتاجين يقعدوا ٢٤ ساعة علي الكتاب . . .
واخيرا بلاش نضطهد و نشتم في البلد ونفضل ننتفض كل حاجة بالشكل دا لان في الاول والأخير البلد دي عبارة عن شعب ولو هتنهض فهتنهض بينا وبشغلها وكلامنا الحلو عنها ولو هتسقط فهتسقط بينا و بكسلنا وبكلامنا الوحش عنها و اضطهدنا ليها ….. مفيش دولة نهضت ابدا و شعبها بيضطهدها وياريت كلامي تفكروا فيه بجد ودا مش علي التعليم بس لا دا علي كل حاجة في الدولة … مصر هي أغلي حاجة عندنا ولو اتكلمنا احنا عنها وحش مش هنقدر نمنع اي حد انه يتكلم عنها وحش
