د عمرو الليثى لرئيس الوزراء وفروا الامكانيات لعمال مصر عايزين يشتغلوا
قال الاعلامى د. عمرو الليثى فى مقدمة برنامج واحد من الناس الاضرابات رجعت تاني والعمال سابوا ماكيناتهم واشغالهم ورجعوا للرصيف تاني يدورا علي حقوقهم ..ومش مصنع ولا اثنين ولا شركة ولا ثلاثة لا دي بقت ظاهرة والغريب لما تسال ليه يا اخوانا قفلتوا ماكيناتكم يقولوا لا فيه مرتبات ولا مواد خام ولا اي حاجة .
ووجه الليثى نداء الى رئيس وزراء مصر بأن عمال مصر وطنيون وعايزين يشتغلوا وفروا لهم الامكانيات بس .
د عمرو الليثي لوزير القوى العامله انت فين ودورك اية لحل المشاكل
واضاف الليثى ولما شركة مصرية في السويس تستقدم 100 لحام اجنبي وتسيب ولاد البلد عواطليه تبقي دي حاجة غريبة ..لحام دي يعني مش مهنه محتاجه خبير ولا حاجة .. الحقيقة مش عارف وزير القوي العاملة فين ،ودوره ايه في المشاكل دي
د عمرو الليثي لوزير الصحة احنا في مصر يا سيدي
واوضح الليثى ان دكتور في مستشفي الفرافرة رفض يعالج مريض في الاستقبال الا بعد ما يخلص دور الدومينو. اه والله كان بسلامته بيلعب دومنيو في المستشفي وساب المريض تعبان ..يا وزير الصحة الراجل دا حولته للتحقيق طب عملته ايه في مدير المستشفي ووكيل الوزارة المهملين .. لو هذه الحادثة حصلت في اي مستشفي في اي مكان في العالم كان الوزير استقال وحاكم كل مسئولي مديرية الصحة ..لكن نقول ايه احنا في مصر
د عمرو الليثي لوزير التربية والتعليم ايه رأيك في الي بيحصل ده هل من مجيب
وأشار الليثى الى ان 12 تلميذ بالشرقية اصيبوا بالتسمم بعد تناول وجبة في حصة الاقتصاد المنزلي بالمدرسة .. يا وزير التعليم كنت بتشتكي من مُوردي الوجبات وقلت فيهم القطط الفاطسه.. طب دلوقتي ايه رايك بقي في اللي بيحصل دا
