الاكسسوارات بقيت حاجة أساسية في حياة بنات كتير جدا، ولما بنقول اكسسوار يبقى قصدنا أكتر من نوع، في حلق وخواتم وسلاسل وغوايش والاكسسوارات برضه جزم وشنط وأجزمة.
بس إحنا هنتكلم عن الجزء الأولاني من الاكسسوار وهو الغوايش والخواتم والسلاسل…
كل بنت طريقة لبسها للإكسسوار بتختلف عن بنت تانية، في بيحبوا تبقى حاجات بسيطة وفي بيحبوا الزحمة سواء في لبسهم للغوايش أو الخواتم والسلاسل، وكل محل بيقدم ستايل معين مش لازم يكون بيعجب كل الناس بتبقى على حسب ذوقك…
في ناس بتحب الستايل البوهيمي وفي الكلاسيك وفي الفرعوني ومعظم الحاجات دلوقتي تقدروا تلاقوها أونلاين وبتطلبوا الطلب وبيجلكم عند البيت، بس المحلات مابقتش كتيرة أوي زي زمان..
هنقولكم مجموعة كده من المحلات والحاجات الأونلاين اللي ممكن تشتروا منها اكسسوارات مختلفة.
Azza Fahmy -1 من أكتر الستات اللي مشهورين في مجال الإكسسوار، معروفة بتصميماتها في الذهب والفضة وبتستخدم الخط العربي والمقتبسات من شعراء وفلاسفة والحاجات الفرعوني في تصميمات كتير جدا جدا، محل عزة فهمي موجود في الزمالك (15 شارع طه حسين بجوار Patchi وعلى ناصية شارع المرعشلي).
2- Frillu ده من الأونلاين شوبينج، في حلقان وفي سلاسل وفي خواتم وفي كمان نضارات وبيبقى في مجموعة من اللبس بس مش كبيرة أوي، بتطلبي الطلب أونلاين وبيوصلك للبيت وتقدري ترجعيه لوعايزة، ده موقعهم بالأسعار كلها www.Frillu.com
3- Atef Wassef Silver، عاطف واصف محل فضيات موجود في وسط البلد، عنده تشكيلة كبيرة وحلوة جدا من الخواتم وعنده غوايش وسلاسل كمان، وده العنوان: 54 شارع عبد الخالق ثروت وسط البلد وتقدروا تتابعوهم على انستجرام عشان كل جديد وده رقمهم:022390395
4- خان الخليلي طبعا من الأماكن الحلوة اللي تقدروا تجيبوا منها اكسسوارات
5 – محلات ألدو في كذا فرع منه، تشكيلة الاكسسوارات مش بتبقى كبيرة أوي بس موجودة وفي ساعات كمان، بس الناس بتروحه لشنط وجزم أكتر من اكسسوار
