رد الرئيس عبد الفتاح السيسى، على فيديو أعدته “ساندرا نشأت”، خلال لقائه ببرنامج “حوار شعب ورئيس”، عن أسئلة وآراء المواطنين فى الشارع، مشيراً إلى أن ما استوقفه هو الحديث عن “الأمن والأمان”.
وأضاف الرئيس “المواطن يهيئ له إن فيه حد رقيب على كلامه”، موجها حديثه للمواطن المصرى:”أوعى تتصور أن ما تقوله سياسة، ويجب التفكير فى كل كلمة تقولها، لأن ما تقوله ستصدقه، وعندما تقول “مفيش أمل” ستعيش ولا يوجد أمل، والقول بأن الأمن بياخد الناس، وقعدت ترددها هتعيش بأن هناك حالة فى مصر تمنع الناس تتكلم براحتها، ودا مش موجود، أو على الأقل مفيش توجيه بكده خالص.. كلام مش مظبوط”.
وتابع: “الناس حرة تماماً فى كل آرائها وتصرفاتها، لكنهم غير أحرار فى أن يأذوا الناس بعمل عنيف”، لافتاً إلى أن المتحدثين فى التقرير لم يلوم أحد نفسه ويقول :”أنا عندى 5 عيال ومش عارف أأكلهم”، وأردف:” وأنت بتجيب 5 أولاد كنت عارف إنك هتقدر تأكلهم ولا لأ، ولا حد هيأكلهملك، انتوا قلتوا كلام صعب وأنا أستحمله، هتستحملوا منى الكلام الحقيقى”.
وذكر السيسى، أن أنبوبة البوتاجاز تتكلف 130 جنيه، وتصل للمواطن بـ 30 جنيه، وتتكلف الدولة 100 جنيه، وتدعم بـ 50% من الوقود، بالإضافة إلى أن بطاقات التموين للمواطنين وصلت إلى 50 جنيه لأول 4 مواطنين فى الأسرة، وكذلك 800 ألف وحدة إسكان اجتماعى، واستفادة أكثر من 2 مليون مواطن، ظروفهم صعبة فى برنامج “تكافل وكرامة”.
و قال السيسى، إنه لا يكون سعيدا عندما يتم إفراغ الشارع أثناء انتقاله من مكان إلى آخر، وأنه يريد دائمًا أن يكون وسط الناس “كل الناس”، وهو الأمر الذى يعانى من عدم توافره، معلقًا بأن هذا الأمر يراجع إلى وصوله فى أوقات محددة.
وأكد السيسى، مجيبًا على تساؤل ساندرا، أن أولاده حينما يناقشونه يكون كل همهم ألا يأخذ قرارات صعبة، فيرد عليهم: “أنا عملت معاكوا كده، أنا برضو كنت معاهم مش سهل عشان يبقوا كويسين”.
وأضاف السيسى، أنه بالنسبة للمرأة وتقديره لدورها فهو أمر نابع عن تجربته الشخصية الثرية جدًا، بدور المرأه فى حياته، وقد يكون هناك شخص آخر عاصر تجارب صعبة مع المرأة تجعله كارها.
وأجاب السيسى، على السؤال الخاص بمستقبل الأحفاد وما يتمناه لهم فى مستقبلهم، أنه لا يريد أن يكون مبالغا، لكنه يرى مستقبلًا على غير ما نحن فيه الآن، وسيكون فى المستقبل القريب.
وسألت ساندرا نشأت الرئيس عن الخاتم الذى يرتديه دائما، قال إنه هدية غالية عليه من والده ويعتز به جدًا.
قال الرئيس إن الاقتصاد المصرى فى الخمسينيات كان “كويس”، حتى عام 1962، رغم وجود البسطاء وأصحاب الظروف الصعبة، مضيفا: “مش عاوز حد يقول إنى بعمل إسقاط على حد”، ولكن بعد ذلك دخلت مصر حرب اليمن لـ 5 سنوات، مما تسبب فى ضياع كل غطاء الذهب المصرى، وكان الدولار بـ 30 و35 قرشا، حتى 1967 حيث دخلت مصر فى أزمة أخرى كبيرة وكانت بحاجة لقوام هائل لإعادة بناء الجيش.
وأضاف الرئيس أن حرب الاستنزاف كانت ضربة هزت الاقتصاد، والبلد تجمدت منذ 1967 حتى 1977، وكان لا صوت يعلو فوق صوت المعركة، والمصريين تحملوا كل شيء لاستعادة الأرض، وبعد 1977 تم إجراء عملية السلام، واختلفنا مع الأشقاء ولم نجد من يساعدنا، فى ظل ارتفاع عدد السكان، وارتفاع مطالب التقدم الحضارى، مضيفًا :” حصل جمود غصب عننا، العيب مش فى عبد الناصر ولا السادات، والدولة تعثرت 10 سنين لكن المجتمع كان ينمو وكان عاوز إسكان ومدارس ومستشفيات، وهذه التراكمات تسببت فى المشاكل لمصر، هذه بلدنا كلنا ولا بد أن نعرف الظروف والتحديات، ولما نعرف هنقدر نقف قدام التحديات وهنتغلب عليها، وإحنا اتغلبنا عى كل هذه التحديات من الكهرباء والغاز وأزمة الدولار، وانتوا شايفين الأمل، وهذه خطوات وتحديات عبرها المصريين والشعب بنجاح”.
وعن الشيء الذى يجعله لا يخوض سباق الرئاسة، قال: “الشعب المصرى.. هما الأول والآخر، وسيرتى عند ربنا.. وربنا هو اللى مسيطر على قلوب الناس وعقولها.. وعبد الفتاح الإنسان إنسان زيك، وزيكم فى الشارع، وهو إنسان عادى وبسيط.. ونفسى أشوف بلدى حلوة ومعرفش غير العمل والعمل والعمل وبس”.
قال الرئيس، إن التعليم الحقيقى يغيب منذ سنوات طويلة، وتابع: “غايب من أكتر من 30 سنة.. وفيه قرار دلوقتى إن التعليم الجامعى يشتغل مع أحسن 50 جامعة فى العالم، وده خطوة علشان يبقى أحسن”.
وأضاف السيسى، أن برنامج إصلاح التعليم سيطلق العام الحالى أو القادم، وسيستمر لمدة 14 سنة، حتى نجد نتاجا حقيقيا لما نتمناه”، فيما تحدث عن الممارسة الديمقراطية بالقول: “بنقول آه عارفين إنه هو اللى هينجح بس كنا عاوزين حد يبقى موجود معاه، لكن أنا عاوز أقول حاجة.. انتو بتكلمونى فى موضوع أنا مليش ذنب فيه خالص، والله العظيم أنا بحلف بالله العظيم.. أنا كنت أتمنى إن يكون موجود معانا 1 و2 و 3 و 10 من أفاضل الناس وتختاروا زى ما أنتوا عاوزين.. لكن إحنا لسه مش جاهزين.. وإحنا بنقول للأحزاب لأكتر من 100 حزب قدموا حد”.
وتابع السيسى: “أهم حاجة فى الإعلام إنه يبقى مدرك تماما حجم قضية مصر فى كل الاتجاهات، وده محتاج جهد كبير جدا وإعداد كبير من اللى هيطلع يقابل الناس ويتكلم معاهم، ولو مكنش عنده خلفية قوية عن الواقع الموجود فى مصر، والتحديات والحل بتاعها وكمان يستضيف ناس متخصصة متعلمة جدا تتناول المسائل بشكل علمى”.
وأردف: “مش معقولة أنا كل يوم أطلع كإعلامى، أقعد 5 ساعات ولا 4 ساعات.. هقول إيه كل يوم؟.. مفيش حد يقدر يطلع كل يوم ويتكلم.. ده مش صح.. هقول إيه كل يوم لمدة سنة؟ المواضيع خلصت.. وميصحش إنه يكون فى عندنا عوار يبقى نقدم نفسنا على إن إحنا كده مصر بشعبها وناسها كده.. لكن هنعمل إيه عاوزين نسبة مشاهدة وإعلانات علشان نصرف على القناة”.
