من أخطر أنواع الإدمان على النفس هو إدمان الأشخاص .. حينما تدمن حياتك وتربطها بشخص معين .. شخص يأخذ تفاصيل يومك .. شخص تسلط عليه الأضواء في كل يومك لو غاب عنك ساعة تشعر بالعطش لصوته لكلامه لهمساته .. تشعر بأن حياتك تبتسم لوجوده وتكتئب لعدم وجوده .. تشفى وهو بجوارك وتمرض وهو بعيد عنك.
شخص يتحول فجأه كقطعة من السكر تحلى بها يومك .. شخص يتحول لقطعة من الشيكولاته تعدل بها مزاجك أو كنسمة هواء تمر عليك في ليلة صيف حارة.
الشخص المدمن حالة مستعصية، يتجنن لو حس أن من يدمنه اختفى من حياته أو لا يشعر به أو يهمله أو ليس على باله، فيحايل فيه ويهتم أكثر وأكثر على أمل إنه ما يخسرش متعة الإدمان.
إدمان الأشخاص مرض لعين يصاب به نوع مميز من البشر يعانى من وحدة مفرطة ويعانى من ألم وذكريات مؤلمة مرت به، فعندما يجد شخصا يحبه فيتعود عليه ويدمنه وللأسف الإدمان يتحول في لحظة إلى حب تملك، وحياة الشخص المدمن بتتوقف على الشخص الذى أدمنه، و ده طبعا في حد ذاته شئ مش صح.
مش صح إن سعادتنا أو روحنا أو متنفس الهوا في حياتنا تبقى متوقفة على شخص واحد، لو عملت كدة فإنت بتحكم على نفسك كمدمن بالإعدام، لأن الشخص اللي أدمنته لو مشي انت هاتموت، هتموت حرفيا.
لو حسيت إن في حد مدمنك بلاش تكون ندل معاه كن راقي الإحساس، عامله بنزاهة ولطافة ورقي وفوّقه من إدمانه وعالجه منك طالما إنك مش مهتم ومش عايزه في حياتك، أو مش قابل إنك تبقى جوه روتين حياته.
وفي النهاية، إدمنوا الشخص الصح اللي مش هيكون سبب في أى أذى حتى لو مشي و لو حظك تعس وربنا وقعك في الشخص الغلط واتكعبلت وأدمنت شخص غلط هاتتعب كتير وهتقع كتير وهتعافر بعدها وتقوى وصدقنى لو عايز تشفى هتشفى وهترجع إنسان جديد.
قبل ما تقدموا مشاعركم وحبكم إتاكدوا من مشاعره ناحيتكم، الحب غالي، وسهل حد يحبك بس الصعب إنك تلاقى شخص خايف عليك وبيعطيك كل الثقة ويكون مصدر تشجيع ليك فى كل حاجة فى حياتك، شخص مهتم بتفاصيلك يكون جنبك فى كل تقلباتك المزاجية، حد خايف عليك لمجرد إنه عايز يشوفك أحسن واحد فى الدنيا ومش منتظر منك مقابل، حد بتزعل لزعله وطاير من الفرحة لمجرد إنك شايفه مبسوط.
الحب جميل لما حد يقدره ويحافظ عليه، ماتستهونوش بالحب والمشاعر، ومتوهبش الحب غير للى يستاهله، للشخص اللى يقدره ويفضل متمسك بيك ويتحدى العالم من أجلك، هنعيش مرة واحدة، فعيشها بصدق ونقاء، وسيبك من الحب المؤقت أو المزيف، ومتضيعش وقتك مع حد ما يستاهلكش، ضيع وقتك مع حد يستحق إنه يستاهلك.
